Naša Budućnost je, u prvoj utakmici 1. kola kvalifikacija za Ligu konferencija, poražena od ekipe Mališeva na stadionu u Podujevu – na kraju minimalno 1:0.
“Plavo – bijeli” su odigrali bolje prvo poluvrijeme, imali tri – četiri dobra pokušaja, dok protivnik nije imao nijedan opasan napad na našoj polovini. Međutim, drugo poluvrijeme je bilo drugačije…
Umjesto da “plavi” nastave da igraju i prijete, prijetio je domaćin – i na kraju mu se to isplatilo – Bruti je u 67. minutu pogodio, a Mijatović nije mogao ništa iako je iz slične situacije spasio čist gol na početku drugog dijela.
“Prvo poluvrijeme smo odigrali taktički dobro, iz niske i srednje zone smo neke situacije gdje smo mogli bolje da reagujemo. Napravili smo tri, četiri polušanse i ništa nije nagovještavalo da će se stvari promijeniti u nastavku. Ipak, fizički smo pali, onda se ni taktički nismo držali dogovora jer smo pokušali nešto prema naprijed – da izađemo visoko bez razloga. Ne znam čemu to i iz te situacije smo primili gol”, rekao je Brnović, koji nije mogao da bude zadovoljan, ali je svjestan da naš tim ima aktivan rezultat pred revanš…
“Cilj je bio da ne primimo gol i da ugrozimo rivala iz kontranapada. Mališeva se pokazala kao dobar tim, fizički spreman, to je negdje i presudilo na kraju. Izgubili smo, ali imamo aktivan rezultat – u revanšu ćemo da probamo da nadoknadimo propušteno i sigurno da će biti teško”.
Revanš se igra za sedam dana, 18. jula 2024. godine, na stadionu pod Goricom – utakmica počinje u 21.00 sati.
